Ака уйӑхĕн 25-мĕшĕнче кашни çулах Чӑваш чĕлхи кунне уявлаççĕ. Кăçалхи вара ахальли мар, Аслă вĕрентекенĕмĕр çуралнăранпа 170 çул çитнине халалланăскер. Чун халалĕнче чӑваш халӑхне çутта кăларассишӗн пĕтĕм пурнӑçне хывнӑ çын, И.Я.Яковлев хӑйӗн тивлетне чӑвашсене таса чунлӑ та мал туртӑмлӑ пулма пилленĕ.

«Тӑван чӗлхе — халӑхӑн аваллӑхĕ, тӑван чĕлхе — халӑхӑн сумлӑ та телĕйлĕ малашлӑхĕ», — тенĕ Г. Н. Волков ӑсчах. Чӑваш чĕлхи чуна лӑпкӑн ачашлать, канӑç кÿрет. Хӑйне хисеплекен кирек мӗнле халӑх та хӑйӗн тӑван чӗлхине пысӑк пуянлӑх вырӑнне хурса хаклать. Сĕм авалтан чĕлхе çынсене сӑмахлӑх, юрӑ-кĕвĕ, ташӑ-çемĕ, йӑла-йӗрке урлă пĕр-пӗринпе çывӑххӑн хутшӑнса пурӑнма пулӑшнӑ.

Ачасене халăх йăли-йĕркине упрама, тăван чĕлхе илемĕпе пуянлăхне туйма вĕрентес тесе Комсомольски районěн «Асамат кĕперĕ» 3-мĕш ача сачĕ муниципалитетăн автономилле шкул умĕнхи вĕренÿ учрежденийěнчи çак кун кашни ушкăнрах тĕрлĕрен мероприятисем туса иртерчĕç. Аслă ушкăнри ачасене И.Я.Яковлев пурнӑçĕпе, пултаруллӑхӗ çинчен каласа пачĕç, унăн калавĕсемпе паллаштарчĕç. Вăтам ушкăнри ачасем «Пукане» юрра илемлĕн шăрантарчĕç. Тихонова Мария, аслă ушкăнри хĕрача, Николай Ишентей «Виçĕ çавра – чăваш ачи тавра» сăвва питĕ тăрăшса вуласа кăтартрĕ. Вăл район шайĕнче «Хунав» конкурсра çак савăпа 1-мĕш вырăн йышăнма тивĕçлĕ пулчĕ. Шкула кайма хатĕрлекен ушкăнри шăпăрлансем И.Я.Яковлевăн «Йăлăнтарни» калавĕ тăрăх лартнă сценкăпа савăнтарчĕç («Хунав» конкурсра -3-мĕш вырăн).

Чи кĕçĕннисем вара чӑваш халăх вăййисене выляса киленчĕç: «Тарналла», «Лашалла», «Кайăкла» тата ыттисене те.